భద్రాద్రి – కొత్తగూడెం జిల్లా
✍️దుర్గా ప్రసాద్
పాల్వంచలోని ఒడ్డుగూడెం మెయిన్ రోడ్డులో ముత్యాలమ్మ తల్లి గుడి ముందున్న డ్రైనేజీ వ్యవస్థ స్థానికులకు, ప్రయాణికులకు తీవ్ర ఇబ్బందులు కలిగిస్తోంది. డ్రైనేజీ మధ్యలో ఉన్న ఒక విద్యుత్ స్తంభం కారణంగా వర్షాలు వచ్చినప్పుడు నీటి ప్రవాహం అడ్డుపడి, మురుగునీరు రోడ్డుపైకి చేరుతోంది. దీంతో ప్రజలు తీవ్ర అవస్థలు పడుతున్నారు.
వర్షాకాలంలో ఈ ప్రాంతం ప్రజలకు నరకప్రాయంగా మారుతోందని స్థానికులు ఆవేదన వ్యక్తం చేస్తున్నారు. డ్రైనేజీలోంచి వచ్చే చెత్తాచెదారం, వ్యర్థాలు విద్యుత్ స్తంభానికి అడ్డుపడటంతో నీటి ప్రవాహం నిలిచిపోతోంది. దీంతో డ్రైనేజీ నిండిపోయి, మురుగునీరు మొత్తం రోడ్డుపై ప్రవహిస్తోంది. ఈ మురుగునీటిలోంచి ప్రయాణించడం పాదచారులకు, వాహనదారులకు చాలా కష్టంగా మారింది. దుర్గంధం వెదజల్లడమే కాకుండా, దోమలు పెరిగిపోయి అంటువ్యాధులు ప్రబలే ప్రమాదం ఉందని స్థానికులు భయాందోళన వ్యక్తం చేస్తున్నారు.
గత కొన్నేళ్లుగా ఈ సమస్య వెంటాడుతున్నప్పటికీ, అధికారులు పట్టించుకోవడం లేదని స్థానికులు ఆగ్రహం వ్యక్తం చేస్తున్నారు. ఇప్పటికైనా సంబంధిత అధికారులు స్పందించి, డ్రైనేజీ మధ్యలో ఉన్న ఈ విద్యుత్ స్తంభాన్ని తొలగించి, రోడ్డుకు దూరంగా ఏర్పాటు చేయాలని కోరుతున్నారు. తద్వారా వర్షపు నీరు సాఫీగా పారి, రోడ్డుపై మురుగునీరు చేరకుండా చూడాలని విజ్ఞప్తి చేస్తున్నారు.
ఈ సమస్యను తక్షణమే పరిష్కరించి, స్థానిక ప్రజల ఇబ్బందులను తొలగించాలని డిమాండ్ చేస్తున్నారు.
